Wihnacht 1925 in Grabow, Erinnerungen von Paul Bachmeyer

  
  Paul Bachmeyer hat am 25.12.1968 die folgenden Erinnerungen an Grabow und die Weihnachtszeit in den Lübecker Nachrichten veröffentlicht:

  Eigentlich müsst ick achter minen Namen Penzlin setten, denn ich bün en Punschendörper, indem da tick dor an 22. Juni 1902 mit Blasmusik taur Welt käm.
  Dat was tauer Königschusstiet un de Bürmeister, de drangen bi min Öllern wahnen ded kreg taum Freuhstück sinen Marsch blast. Twei Johr larer würd min
  Vadder nah Grabow versett’t, denn he wier riden Schandor un ick müsst zwangswis mit. Mi is dat öwer ni nich leed worden. Disse lütte verdrömte Stadt an de
  Ell mit ehr Fachwarkhüser hadd mi dat andan un is min Heimat worden.

  Mit dissen Minschenslag vull boren Börgersinn, Fliet un Ebendrächtigkeit bün ick upwussen. De Grabowschen wier’n nich mükrig. Se fierten ehr Feste so as se
  föhnen un dat nich slecht. Und meistens güng dat sihr lustig tau, denn oft hadden de Grabowschen enen in den Sinn. As min oll Fründ Hein Hennings von
  Groten Wandrahm eines dags von enen Frömden an de Markteck fragt würd, ob in Grabow nich ok ens en grot Mann burn worden wier, dunn säd he ganz drög:
  „Nö, soveel as ick weten dau, sünd hier blots ümmer lütt Kinner taur Welt kamen.“

  As ick tau Wihnacht 1925 mine Öllern bisöken ded, wier de Hewen gris und swor vun Sne und
  Is. De Straten wier’n vull Sneschanzen und Fritz Liermann was mit veer Pier und den Sneplaug
  in’e Gang. En Hopen Jungs stünden up den Plaug und juchten mit de Klingels in’e Striet, de
  de Pierd üm den Hals hängen hadden. Öwer de Rehbarger Brüch hult en asig Wind und de
  Böhm und Strüker bögten sick ünner Ruhriep und Sne. Vör’t Rathus stünn en Dannenbom und
  hen und wenn löp en Minsch ilig und inmümmelt öwern Markt. In den Ratskeller wier’n weck
  an’t Gröhlen. Eier’n apenbor ken Wihnachtsleder. Wier jo ok noch nich sowiet. De Rathus-
  senklock slög elm und de Maandsichel mit de dre Stirns up dat Grabowsch Stadtwappen
  lachten mi tau.

  Ick dacht an Friedrich Franz Floerke und sinen Fründ Fritz Reuter. As Fritz Reuter dunn nah
  Doemz up de Festung süll, slöp he baben int Rathus un wier Gast von den Bürmeister
  Floerke. Ick hevv veel veel larer as Lihrling in disse Stuw seten. Wat hett enen de verläden Tiet
  nich all’s tau vertellen. All de Johrenhett mi de Gedanken an de ollen Flurnamen üm Grabow
  rümmer nich loslaten. Landwehr, Gerichtsstück, Schmuckstück! Düstre Würt, düstre Tieden!
  Dorünner dat verswunne Dörp Lassahn üm de Hütige Meddagsstäd rümmer.

  Min Vadder wier oewer Land reden. He wull nah Dadow und Wanzlitz abersten tau gaude Tiet trüch sin. Ick trök mi’n Poor Rietstewel an, stülpt den Haut up,
  säd Muddern abschüßok und güng einen ollen vertrugden Gang öwer de Friech-Franz-Brüch an min oll Schaul vörbie nah’n Galgenbarg. De heimatliche Luft
  wull ick hevven. Storm und Drang in mi in disse gottvergeten Tiet wull Ruum för de Wihnacht tau Hus. Gew dat oewerhaupt enen Gott? De Wind blüst mi degt
  den Snestoo int Gesicht un de Atem dampt. Verdorrig noch enmal, was dat kolt hier buten. All’s üm mi rümmer woer witt. Nich mal ne Kreih woer tau seihn.

  Ok disse Natur in ehr isige Küll, inslagen as in Likendauk is grot und sprekt ehre egene Sprak. Von Gott? Möt woll so sin. Wohrhaftig? Und all de annersorigen
  Religionen? Givvt dat mihrere Götter? Orer is dat in Würklichkeit ümmer en un desülwigte un blot de Globen is annersorig? Wenn ok. Is dat Starben von
  Millionen Minschen in de Kriege von Gott stillswigens gautheten? In sine Allmächtigkeit hadd he dissen Blödsinn doch verhöden künnt?

Na, dor is min olle Galgenbarg. In dit Holt hevven wi as Schauljungens Räuber und Suldot spelt, und heil veel Spaß hadd. Enmal fünnen wi bi’t Höhlenbugen en dull verrust Ridderschwert. Müßt woll ut den dörtigjährigen Krieg stammen orer von den Lassahner Ridder. De Dannen und Fichten liggen swor vull Sne, und narrens is hier en Sneplaug lanker kamen. Blot Karnickels und Hasen havven tapsig ehre Spor hinnerlaten. De Sne gnurscht ünner min Stewel. Süß is dat mucksingstill ringsüm un dor vör mi liggt dat frie Feld mit de hogen Böm üm de Meddagsstäd, as se dortauseggen.

Hier sall Lassahn ens legen hevven. En Ridderhof? Wohrschienlich. För en grot Buerndörp is de Ruum twüschen Kremmin un Grabow tau lütt. De Ridder sall sin Frau umbröcht hevven, so seggt de Sag! Nu find’t he ken Rauh in’t Graww un sall twüschen twölm un een des Nachts männingmal mit sin Schimmelspann dörch Grabow jagen. Wenn een em tau Gesicht kriegen deit, denn möt hei korte Tiet later starwen. So seggt de olle Sag. Abersten nix genaues weit man nich. Und doch is mi, as leg hier an disse Städ, wo gornich wiet al de arm Sünders
                                                                                                                                 von den Schinnerhannes kortfarrig an den Galgen upknüppt würden, en
    Auschnitt aus einer Flurkarte aus dem                                                                      ganz Geschicht begraben. De Plaug hett so männigdeel in de
    Flurnamenatlas des südlichen Südwestmecklenburg,                                                 Johrunderten unnerplögt. De Namen „Gerichtsstück“ blew und de
    von Werner Zühlsdorff,                                                                                             „Galgenbarg“ ok. Up de anner Siet de „Schmuckstücke“ sünd nich beter.
    Berlin, Akademie-Verlag 1970                                                                                  Hier würden Hexen verbrennt. „Smokstück“ un nahst de velen Daden 
                                                                                                                                 von de Pest un Cholera.

  De Klock is veer. Von Grabow röwer lürren de Klocken. Is Wihnachterhilligabend! Ick glöw, dat dat enen gewaltigen Gott oewer uns givvt, oewer de lett sick nich
  von jeren in sin Korten kiken. Wat freuh ick mi tau den Dannenbom un den dampen Grog dortau!

                                                                                                                                                                                                                            

Zurück